पुढील महिन्यात अफगाणिस्तानविरुद्ध होणाऱ्या एकमेव कसोटी सामन्यासाठी भारतीय क्रिकेट संघात तीन नवोदित खेळाडूंचा समावेश करण्यात आला आहे. पंजाबचा वेगवान गोलंदाज गुरनूर ब्रार, डावखुरा फिरकी गोलंदाज मानव सुथार आणि हर्ष दुबे यांची निवड झाली आहे. देशांतर्गत क्रिकेट आणि आयपीएलमधील सातत्यपूर्ण कामगिरीमुळे गुरनूरच्या निवडीने लक्ष वेधून घेतले आहे. वेग, उसळी आणि चेंडू दोन्ही बाजूंनी स्विंग करण्याच्या क्षमतेसाठी ओळखल्या जाणाऱ्या, 6 फूट 5 इंच उंचीच्या या गोलंदाजाने गेल्या दोन हंगामात पंजाबच्या कसोटी संघात आपले स्थान पक्के केले आहे.
पंजाबमध्ये जन्मलेल्या गुरनूर सिंग ब्रारने देशांतर्गत क्रिकेटमध्ये एक आश्वासक वेगवान गोलंदाज म्हणून स्वतःला सिद्ध केले आहे. गुरनूरने 2022 मध्ये प्रथम-श्रेणी क्रिकेटमध्ये आणि 2023 मध्ये पंजाब किंग्सकडून आयपीएलमध्ये पदार्पण केले, परंतु 2024-25 चा देशांतर्गत हंगाम त्याच्यासाठी निर्णायक ठरला. रणजी ट्रॉफीमध्ये तो पंजाबचा सर्वात यशस्वी गोलंदाज होता, त्याने शिस्तबद्ध गोलंदाजी करत सात सामन्यांत 26 बळी घेतले.
शुभमन गिलसोबत खास ओळख
ब्रारने खुलासा केला की, भारतीय कर्णधार शुभमन गिलसोबतची त्याची ओळख पंजाबमधील ज्युनिअर क्रिकेटच्या दिवसांपासूनची आहे. गिलने त्याची कारकीर्द पुढे नेण्यास मदत केली. त्याने स्पष्ट केले की, तो अंडर-19 दिवसांपासून गिलला गोलंदाजी करत आहे. गिलने त्याला जिल्हा संघात आणि नंतर पंजाब अंडर-23 संघात सामील होण्यास मदत केली. ब्रार आपल्या कारकिर्दीबाबत म्हणतो, मी शिखर धवनला सुद्धा माझ्याने वेगाने प्रभावित केलं होतं. त्यावेळी मी नेट बाॅलर होतो, असेही त्याने सांगितले. आशिष नेहरा यांनी मार्गदर्शन करताना मला नेहमीच मार्गदर्शन केल्याचे तो म्हणतो.
ब्रारची कामगिरी कशी होती?
त्याच्या संस्मरणीय कामगिरींपैकी एक बिहारविरुद्ध होती, जिथे त्याने 5/14 बळी घेत पंजाबला सामन्यावर वर्चस्व गाजवण्यास मदत केली. 2024-25 च्या रणजी ट्रॉफी हंगामात, ब्रारने 12 सामन्यांमध्ये 25.66 च्या सरासरीने आणि 3.43 च्या इकॉनॉमी रेटने 33 बळी घेतले. गुरनूरने टी-20 क्रिकेटमध्येही आपली छाप सोडली आहे. तो 2024 च्या शेर-ए-पंजाब टी-20 लीगमध्ये 22 बळींसह सर्वाधिक बळी घेणारा गोलंदाज होता. त्याच्या अष्टपैलू कामगिरीमुळे तो पंजाबच्या सर्वात आश्वासक उदयोन्मुख वेगवान गोलंदाजांपैकी एक बनला आहे.
नेट बॉलर म्हणून सुरुवात केली?
व्यावसायिक क्रिकेटमध्ये प्रवेश करण्यापूर्वी, ब्रारने 2019 च्या आयपीएल हंगामात मुंबई इंडियन्सकडून नेट बॉलर म्हणून काम केले. त्यानंतर, 2022 मध्ये त्याने गोव्याविरुद्ध लिस्ट ए मध्ये आणि रेल्वेविरुद्ध प्रथम-श्रेणी क्रिकेटमध्ये पदार्पण केले. गोलंदाजी व्यतिरिक्त, ब्रार खालच्या फळीत उपयुक्त धावा करण्यास सक्षम आहे. 2023 च्या रणजी ट्रॉफीमध्ये जम्मू आणि काश्मीरविरुद्ध, त्याने 64 धावांची महत्त्वपूर्ण खेळी केली आणि सिद्धार्थ कौलसोबत 100 धावांची भागीदारी करून पंजाबला चार गडी राखून विजय मिळवून दिला.
आयपीएलमधील प्रवास कसा राहिला?
2023 मध्ये राज बावाच्या जागी पंजाब किंग्सने ब्रारला 20 लाख रुपयांना करारबद्ध केले. देशांतर्गत क्रिकेटमधील त्याच्या दमदार कामगिरीमुळे, गुजरात टायटन्सने 2025 च्या आयपीएल लिलावात त्याला 1.30 कोटी रुपयांना आपल्या संघात सामील करून घेतले. देशांतर्गत आणि आयपीएल स्तरावरील त्याच्या सातत्यपूर्ण कामगिरीमुळे त्याला भारत ‘अ’ संघात आणि आता वरिष्ठ संघात स्थान मिळाले आहे. अफगाणिस्तानविरुद्धच्या कसोटी संघात निवड होणे हा त्याच्या कारकिर्दीतील आतापर्यंतचा सर्वात मोठा क्षण आहे आणि तो आंतरराष्ट्रीय पदार्पणाच्या अगदी जवळ आहे.
