टीसीएस (Tata Consultancy Services Ltd) ही भारतातील बड्या आयटी कंपनीपैकी एक मानली जाते. मात्र, टीसीएसमध्ये (TCS)नोकरीच्या बदल्यात लाचखोरी झाल्याचं उघड झालं आहे. जवळपास 100 कोटी रुपयांची लाच घेतली असल्याचा अंदाज आहे. याप्रकरणी टीसीएस कंपनीनं चार अधिकाऱ्यांना बडतर्फ केलंय. त्यासोबतच तीन स्टाफिंग फर्मवर बंदी देखील घातली आहे. टीसीएसनं यासंदर्भात स्पष्टीकरण देण्यात आलेय.
टाटा कन्सल्टन्सी सर्व्हिसेस (Tata Consultancy Services Ltd (TCS)) या बड्या आयटी कंपनीत लाच देऊन नोकर भरतीचा घोटाळा उघडकीस आला आहे. एका अहवालानुसार, कंपनीचे काही वरिष्ठ अधिकारी त्यांच्या उमेदवारांना नोकऱ्या देण्याच्या बदल्यात स्टाफिंग फर्म्सकडून लाच घेत होते. अनेक वर्षांपासून कंपनीत हे प्रकार सुरु होते. आता घोटाळा उघडकीस आल्यानंतर टाटा समूहाची कंपनी टीसीएसने तातडीने कारवाई केली. कंपनीने आपल्या रिसोर्स मॅनेजमेंट ग्रुप (आरएमजी)मधून चार अधिकाऱ्यांना बडतर्फ केले आणि ३ स्टाफिंग फर्मवर बंदी घातली.
एका व्हिसलब्लोअरने कंपनीच्या सीईओ आणि सीओओला पत्र लिहून आरएमजीचे ग्लोबल हेड ईएस चक्रवर्ती उमेदवारांना नियुक्ती देताना स्टाफिंग फर्म्सकडून लाच घेत आहेत, असा दावा केला. या आरोपांच्या चौकशीसाठी कंपनीकडून त्रिसदस्यीय समितीची स्थापना केली गेली. आणि चौकशीनंतर टीसीएसने आपल्या भरती प्रमुखांना रजेवर पाठवले आणि चार आरएमजी अधिकाऱ्यांना बडतर्फ केले आहे. गेल्या 3 वर्षांत टीसीएसनं कंत्राटी भरतीसह 3 लाख लोकांना कामावर घेतले आहे. या घोटाळ्यात सहभागी असलेल्यांनी कमिशनच्या माध्यमातून किमान 100 कोटी रुपये कमावले असावेत, असा अंदाज व्यक्त केला जातोय. मात्र, ह्या प्रकरणी टीसीएसकडून घोटाळा झालाच नसल्याचं स्पष्टीकरण देण्यात आलंय.
टीसीएसकडून सांगण्यात आलंय की कोणताही घोटाळा झाला नसून काही कर्मचारी आणि स्टाफिंग फर्मकडून नियमांचा भंग झालाय. कंपनीतील भरती प्रक्रिया रिसोर्स मॅनेजमेंट ग्रूपकडून हाताळली जात नाही. सोबतच कंपनीतील कोणताही प्रमुख व्यवस्थापकीय व्यक्ती यात सहभागी असल्याचं आढळलं नसल्याचं स्पष्टीकरण देण्यात आले आहे. दरम्यान, असं असलं तरी दुसरीकडे विविध प्रकल्पांसाठी माणसं उपलब्ध करुन देण्याची जबाबदारी आरएमजीवर असल्याचं टीसीएसकडून मान्य करण्यात आलंय. दुसरीकडे, टीसीएस या घोटाळ्यात आर्थिक धक्का जरी लागला नसला तरी मेहनतीने उभ्या केलेल्या इमेजला मात्र धक्का लागला आहे हे मात्र नक्की.
