पाकिस्तानमधील पेशावर येथे एका खासगी शाळेचे छत कोसळून 28 निष्पाप शाळकरी मुलांचा चिरडून मृत्यू झाला. यामध्ये एका महिला शिक्षिकेचा समावेश होता. सर्व मुले13 वर्षे किंवा त्याहून कमी वयाची होती. हा अपघात दिर कॉलनी परिसरात घडला. 40 हून अधिक लोक जखमीही झाले आहेत. त्यांच्या उपचारासाठी रुग्णालयात आणीबाणी जाहीर करण्यात आली आहे. रुग्णालयाच्या ट्रॉमा वॉर्डमध्ये डॉक्टर आणि इतर कर्मचारी तैनात करण्यात आले आहेत.
पंतप्रधान शाहबाज शरीफ यांनी दुःख व्यक्त केले
पाकिस्तानचे पंतप्रधान शाहबाज शरीफ यांनी अपघातातील जीवितहानीबद्दल तीव्र दुःख व्यक्त केले. त्यांनी मृतांच्या कुटुंबीयांप्रति शोक व्यक्त केला आणि या कठीण काळात त्यांना शक्ती मिळो अशी प्रार्थना केली. पंतप्रधानांनी जखमींना लवकरात लवकर बरे होण्यासाठी शुभेच्छा दिल्या. त्यांनी अधिकाऱ्यांना जखमींवर सर्वोत्तम उपचार करण्याचे आणि बचावकार्य जलदगतीने करण्याचे निर्देश दिले.
राज्यपालांनी चौकशीचे आदेश दिले
खैबर पख्तुनख्वाचे राज्यपाल फैसल करीम कुंडी यांनीही अपघाताबद्दल दुःख व्यक्त केले. त्यांनी मृत मुलांच्या कुटुंबीयांप्रति शोक व्यक्त केला. राज्यपालांनी सांगितले की, निष्पाप मुलांचा जीव जाणे ही एक अत्यंत दुःखद शोकांतिका आहे. त्यांनी जखमी मुले लवकरात लवकर बरी व्हावीत यासाठी सदिच्छा व्यक्त केल्या आणि संबंधित अधिकाऱ्यांना त्यांना सर्वोत्तम वैद्यकीय सेवा पुरवण्याचे निर्देश दिले. त्यांनी अधिकाऱ्यांकडून शाळेचे छत कोसळण्याच्या घटनेबाबत सविस्तर अहवाल मागवताना अपघाताच्या कारणांची चौकशी करण्याचे निर्देश दिलेत.
गेल्या सहा महिन्यांत शाळा कोसळण्याच्या चार मोठ्या घटना
पाकिस्तानमध्ये छत आणि इमारती कोसळण्याच्या घटना वारंवार घडतात. याची मुख्य कारणे म्हणजे सुरक्षा मानकांकडे दुर्लक्ष आणि निकृष्ट दर्जाच्या बांधकाम साहित्याचा वापर.
- उमरकोट – जुलैमध्ये, एका सरकारी शाळेची बाहेरील भिंत कोसळून तीन मुलींचा मृत्यू झाला.
- लाहोर – जुलैमध्येच, बागबानपुरा भागातील एका बांधकाम सुरू असलेल्या खासगी शाळेचे छत कोसळून एका मुलाचा मृत्यू झाला.
- लाहोर – जूनमध्ये, काहना भागातील एका शिकवणी केंद्राचे छत कोसळून 14 मुलांचा मृत्यू झाला.
- डेरा गाझी खान – मे महिन्यात, एका शाळेचे छत कोसळले. यामध्ये चार मुलांचा मृत्यू झाला आणि 20 जण जखमी झाले.
