‘क्राइम पेट्रोल’ (Crime Patrol) हा प्रसिद्ध टीव्ही शो पाहून पोलिसांना चकमा देण्याची कला शिकलेल्या एका सराईत चेन स्नॅचरला (Chain Snatcher) पिंपरी-चिंचवड पोलिसांनी थरारक पाठलाग करून अटक (Arrest) केली आहे. अटक करण्यात आलेल्या आरोपीचे नाव सुमित इंगले (Sumit Ingale) असून तो सोलापूरचा (Solapur) रहिवासी आहे. गेल्या दीड-दोन महिन्यांपासून त्याने पिंपरी-चिंचवड शहर आणि परिसरात उच्छाद मांडला होता. या धडक कारवाईची माहिती अतिरिक्त पोलिस आयुक्त सारंग आव्हाड (Sarang Awhad) यांनी पत्रकार परिषदेत दिली.
Pune Crime News: 150 ते 200 सीसीटीव्ही फुटेजच्या आधारे लागला सुगावा
शहरात सातत्याने घडणाऱ्या चेन स्नॅचिंगच्या घटनांमुळे पोलिसांवर आरोपीला पकडण्याचे मोठे आव्हान होते. सांगवी पोलीस ठाण्याच्या (Sangvi Police Station) हद्दीत घडलेल्या ताज्या गुन्ह्यानंतर या तपासाची सूत्रे गुन्हे शाखा युनिट-1 कडे सोपवण्यात आली. तपासादरम्यान पोलिसांनी घटनास्थळ आणि संभाव्य मार्गांवरील सुमारे 150 ते 200 सीसीटीव्ही (CCTV) फुटेजची कसून तपासणी केली. या विश्लेषणातून पोलिसांना समजले की, आरोपी प्रत्येक चोरीनंतर बाणेरच्या दिशेने पळ काढत असून बाणेर-पुणे महामार्गाचा वापर करत आहे.
Pune Crime News: वेशांतर करून ‘डेड एंड’वर रचला सापळा
माहिती मिळताच पोलिसांनी मागील तीन ते चार दिवसांपासून या महामार्गावर जाळे विणले होते. गुन्हे शाखेचे पोलीस कर्मचारी वेशांतर करून दबा धरून बसले होते. सकाळी संशयित आरोपी पोलिसांच्या नजरेस पडला. आरोपी एका बंद रस्त्याकडे म्हणजेच ‘डेड एंड’कडे वळताच, आधीच सज्ज असलेल्या पोलिसांनी त्याला चारही बाजूंनी वेढा घालून ताब्यात घेतले. या थरारक कारवाईचा व्हिडिओ सोशल मीडियावर प्रचंड व्हायरल झाला असून, उत्कृष्ट कामगिरीबद्दल संबंधित पोलीस पथकाला सन्मानित करण्यात येणार असल्याचे अतिरिक्त पोलिस आयुक्तांनी सांगितले.
Pune Crime News: ‘क्राइम पेट्रोल’ पाहून बनला सराईत चेन स्नॅचर
पोलीस चौकशीत समोर आले आहे की, सुमित इंगले हा जुना गुन्हेगार असून 2016 ते 2024 या कालावधीत तो सक्रिय होता. त्याच्यावर पुणे शहर, पुणे ग्रामीण आणि पिंपरी-चिंचवड परिसरात यापूर्वीच आठ गुन्हे दाखल आहेत. जेलमधून सुटल्यानंतर त्याने सामान्य जीवन जगण्याचा प्रयत्न केला होता, मात्र जुगाराच्या व्यसनामुळे तो कर्जबाजारी झाला आणि पुन्हा गुन्हेगारीच्या मार्गावर परतला. आरोपीने कबुली दिली की, त्याने ‘क्राइम पेट्रोल’ या टीव्ही शोचे दोन भाग पाहून पोलिसांपासून कसे वाचायचे आणि चेन स्नॅचिंग अधिक प्रभावीपणे कसे करायचे, याची रणनीती आखली होती.
Pune Crime News: 15 लाखांचे सोने जप्त, 5 गुन्ह्यांचा उलगडा
सुमित इंगले हा एकटाच दुचाकीवरून चोऱ्या करायचा. गुन्ह्यासाठी तो दोन वाहने वापरायचा, ज्यातील एक स्वतःची होती तर दुसरी तो रोजच्या भाड्याने घ्यायचा. या अटकेमुळे पिंपरी-चिंचवड पोलीस आयुक्तालय हद्दीतील चेन स्नॅचिंगच्या 5 गुन्ह्यांचा उलगडा झाला आहे. पोलिसांनी त्याच्याकडून 76 ग्रॅम सोने (Gold) जप्त केले असून, त्याची बाजार किंमत सुमारे 15 लाख रुपये आहे. या प्रकरणी पोलीस अधिक तपास करत असून आणखी काही गुन्हे उघडकीस येण्याची शक्यता आहे.
