नाशिकमध्ये अत्यंत उत्साहात गणेश विसर्जन मिरवणुका निघाल्या. ढोल ताशांच्या गजरात आणि भक्तिमय वातावरणात लाडक्या बाप्पाला निरोप देण्यात येत आहे. मंत्री गिरीश महाजन यांनी महापालिकेच्या गणपतीची आरती करून मिरवणुकीला सुरुवात केली. रस्त्यांवर भाविकांची अलोट गर्दी असून, ढोल ताशा पथकांचा उत्साह शिगेला पोहोचला आहे.
अत्यंत जड अंत:करणाने लाडक्या बाप्पाला आज निरोप देण्याचा दिवस. याचप्रकारे नाशिकमध्येही विसर्जन मिरवणुका पार पडत आहेत. अत्यंत थाटामाटात ढोल ताशांच्या गजरात लाडक्या बाप्पाला निरोप दिला जात आहे.
वाजतगाजत बाप्पाची स्वारी मार्गस्थ
पुढच्या वर्षी परतण्याची ओढ कायम ठेवून वाजतगाजत बाप्पााच्या स्वारीला मार्गस्थ करण्यात आले आहे.
विसर्जनाचा रोमांचक सोहळा
दहा दिवस निस्सिम भक्ती आणि ओतपोत अशा उत्साहाने बाप्पाची आराधना करण्यात आली. आता बाप्पाचा विसर्जन सोहळाही थाटामाटात पार पडत आहे.
मंत्री गिरीश महाजन यांच्या हस्ते गणरायाची आरती
मंत्री गिरीश महाजन यांच्या हस्ते मानाच्या पहिल्या महापालिकेच्या गणपतीची आरती करुन विसर्जन मिरवणूक मार्गस्थ करण्यात आली.
भर पावसातही उत्साह शिगेला
मानाच्या गणपतींची मिरवणूक पाहण्यासाठी रस्त्यांवर अलोट गर्दी लोटली आहे. ढोल ताशांच्या गजरात बाप्पांची मिरवणूक निघाली असून सर्वांचा आकर्षणबिंदू ठरत आहे. भर पावसातही ढोल ताशा पथकांचा आणि भाविकांचा उत्साह मात्र शिगेला पोहोचला आहे.
अडीच तासांत ५ मंडळे मेनरोडपर्यंत
विसर्जन मिरवणूकीतील सहावे मंडळ नाशिकचा राजा बादशाही कॉर्नरजवळ दाखल झाले आहे. अडीच तासांत ५ मंडळे वाकडी बारवपासून मेनरोडपर्यंत पोहोचली आहेत.
मिरवणुकीत थरारक प्रात्यक्षिके
नाशिकच्या प्रसिद्ध शिवसेवा मित्र मंडळाच्या मिरवणूकीत हरियाणा येथून कलाकार दाखल झाले आहेत. ते आपल्या भारावून टाकणाऱ्या कलाकृती सादर करत आहेत.
बाप्पाच्या मिरवणुकीत वरुणराजाचीही जोड
बाप्पाच्या मिरवणुकीत वरुणराजाचीही जोड आहेच. सकाळपासून शहरात रिमझिम पाऊस सुरुच आहे. त्यामुळे वर्षा सरींनी बाप्पाला निरोप दिला जात आहे.
पाऊस थांबल्याने भाविकांची गर्दी
सध्या शहरात पाऊस थांबल्याने आता भाविकांची गर्दी वाढत चालली आहे. डोळ्यांचे पारणे फेडणारा बाप्पाच्या विसर्जनाचा सोहळा आहे.
