वांद्रे पूर्व येथील भारतनगर भागात अनधिकृत बांधकामांवर हातोडा मारण्यास सुरुवात झाली आहे. पोलिसांच्या कडेकोट बंदोबस्तात जेसीबी दाखल झाला असून अनधिकृत घरांचे पाडकाम सुरु करण्यात आले आहे. मात्र शिवसेना (उद्धव बाळासाहेब ठाकरे) पक्षाकडून वांद्रे पूर्वचे आमदार वरुण सरदेसाई यांनी घटनास्थळी धाव घेत एसआरएच्या कारवाईला विरोध केला आहे. या कारवाईमुळे वांद्रे पूर्व परिसरात गोंधळाचं वातावरण निर्माण झालं आहे.
नोटिसा पाठवून कारवाई
अनधिकृत बांधकाम प्रकरणी १७८ जणांना एसआरएकडून नोटिसा बजावण्यात आल्या होत्या. याच्या विरोधात स्थानिकांनी आंदोलन केले. आम्ही ४० हून अधिक वर्ष इथे राहत असताना, अचानक कारवाई का असा सवाल रहिवाशांनी विचारला आहे. ज्या लोकांनी विरोध न करता पाडकामाला परवानगी दिली आहे, तिथे जेसीबी चालवला जात आहे. मात्र एसआरए प्रकल्पासाठी ही जागा ताब्यात घेण्यात आली असल्याने नोटीस पाठवून पाडकाम केले जात आहे.
माणुसकीला धरुन काम करा – सरदेसाई
दरम्यान, या कारवाईवर सुप्रीम कोर्टाकडून स्थगिती आली आहे, असा दावा आमदार वरुण सरदेसाई यांनी केला आहे. त्यानंतरही घाईने कारवाईचा प्रयत्न आहे. माणुसकीला धरुन काम करा, इथल्या लोकांसोबत करार करा, घरांचे अॅग्रीमेंट करा आणि मग विकास करा, हे वारंवार ओरडून सांगतोय. पण यांना काय मुंबई गिळायची आहे का? असा प्रश्न वरुण सरदेसाईंनी केला आहे. १९७० पासून इथे राहणारे सर्व रहिवासी एसआरए अंतर्गत पात्र आहेत, फक्त अॅग्रीमेंट करायला पाहिजे, असे सरदेसाईंनी सांगितले.
दुसरीकडे, नागपाडा येथील एका ३२ मजली इमारतीतील अनधिकृत बांधकामांविषयी कारवाई करण्याविषयी जवळपास ८ वर्षांपूर्वी दिलेल्या किती निर्देशांचे पालन झाले आणि काय कारवाई करण्यात आली, याविषयी प्रतिज्ञापत्रावर तपशीलवार माहिती द्या, असे निर्देश मुंबई उच्च न्यायालयाने बुधवारी मुंबई महापालिकेच्या आयुक्तांना दिले. तसेच, या प्रकरणात सलीम सुपारीवाला व आसिफ रिंदानी यांच्याविरोधात फौजदारी कारवाई होण्यासाठी ४ नोव्हेंबर २०१६ रोजीच्या आदेशाने संमती मिळाल्यानंतर आत्तापर्यंत काय प्रगती झाली आहे, याचीही माहिती न्यायालयाने मागितली आहे.
