Pune Saras Baug : पुण्यातील सारस बागेत गणपती बाप्पासमोर गर्दी जमवून आरती, तरुणावर गुन्हा

पुण्यातील सारस बाग येथील गणपतीसाठी राज्याच्या कानाकोपऱ्यातून भाविक येत असतात. मात्र गणपती बाप्पासमोर गर्दी जमून आरती केल्या प्रकरणी एका तरुणावर गुन्हा दाखल झाल्याचा प्रकार समोर आला आहे. संग्राम खुबे असं संबंधित तरुणाचं नाव आहे.

सारसबग येथे नमाज पठण करण्यात येत असल्याची अफवा पसरल्यानंतर तणावाची स्थिती निर्माण झाली होती. त्यानंतर काही हिंदुत्ववादी संघटना आक्रमक झाल्या होत्या. त्यानुसार दर शुक्रवारी आरती घेण्याचं आयोजन संग्राम खुबे याने केलं होतं.

त्यानंतर स्वारगेट पोलीस ठाण्यात या प्रकरणी गुन्हा दाखल करण्यात आला आहे. त्याला दहा निर्देशांचे पालन करणे बंधनकारक आहे. या घटनेचा हिंदू महासंघातर्फे अध्यक्ष आनंद दवे यांनी निषेध व्यक्त केला आहे.

पुण्यातील सारस बाग येथील गणपतीच्या दर्शनासाठी फक्त शहरातूनच नव्हे, तर महाराष्ट्राभरातून भक्त येत असतात. नवसाला पावणारा गणपती अशी येथील देवाची ख्याती असल्यामुळे अनेक जण आशीर्वाद मागतात. मात्र गर्दी जमवून आरती केल्याप्रकरणी गुन्हा दाखल केल्याच्या घटनेबद्दल आश्चर्य व्यक्त केले जात आहे.

खालील निर्देशांचे पालन करण्याचे तरुणाला आदेश

१) भविष्यात कोणताही गुन्हा करणार नाही
२) या खटल्यातील पुराव्यांशी कोणत्याही प्रकारे छेडछाड करणार नाही.
३) केसची वस्तुस्थिती माहीत असलेल्या कोणत्याही व्यक्तीला कोणतीही धमकी,
प्रलोभन किंवा वचन देणार नाही जेणेकरुन त्याला अशी तथ्ये न्यायालयाला किंवा
पोलीस अधिकाऱ्यांपासून उघड करण्यापासून परावृत्त करता येईल.
४) आवयश्कतेनुसार/निर्देशानुसार न्यायालयासमोर हजर व्हाल.
५) आवश्यकतेनुसार प्रकरणाच्या तपासात सामील व्हाल आणि तपासात सहकार्य
कराल

६) प्रकरणाच्या योग्य निष्कर्षापर्यंत पोहोचण्यासाठी तपासाच्या उद्देशने संबंधित कोणताही भाग नलपवता सर्व तथ्य सत्यतेने उघड कराल.
७) आवश्यक असलेली सर्व संबंधित कागदपत्रे साहित्य तुम्ही तयार कराल.
८) तपासात पूर्ण सहकार्य / सहाय्य कराल.
९) साथीदार खटल्याच्या तपास चाचणीच्या उद्देशाने संबंधित कोणताही पुरावा कोणत्याही प्रकारे नष्ट करु देणार नाही
१०) इतर कोणत्याही अटी, ज्या तपास अधिकाऱ्याने लादल्या जाऊ शकतात