पुण्यात परशुराम आर्थिक विकास महामंडळ उद्घाटनावरुन महायुतीत नाराजीनाट्य पाहायला मिळालं. महामंडळाच्या इमारतीचं उपमुख्यमंत्री अजित पवारांनी उद्घाटन केलं. अजित पवारांनी 10 मिनिटं आधीच उद्घाटन केल्यानं भाजपच्या खासदार मेधा कुलकर्णी नाराज झाल्या. मेधा कुलकर्णी यांनी थेट अजित पवारांसमोरच नाराजी व्यक्त केली. यानंतर अजित पवारांवर पुन्हा एकदा उद्घाटन करण्याची वेळ आली.
झालं असं की, परशुराम आर्थिक विकास महामंडळाचं सकाळी 6.30 वाजता उद्घाटन होणार होतं. पण खासदार मेधा कुलकर्णी या विभागीय आयुक्त कार्यालयात पोहोचण्यापूर्वीच पालकमंत्री अजित पवार यांनी परशुराम आर्थिक विकास महामंडळाच्या नवीन इमारतीचे उद्घाटन केलं होतं. आपण पोहोचण्यापूर्वी आणि 10 मिनिटं आधीच अजित पवारांनी उद्घाटन केल्याने मेधा कुलकर्णी यांची थोडी चीडचिड झाली. यानंतर अजित पवार यांनी मला नव्हतं माहिती असं सांगितल्यांवर मेधा कुलकर्णी असं कसं? अशी विचारणाही केली. मेधा कुलकर्णी यांच्या नाराजीनंतर अजित पवारांनी पुन्हा एकदा या इमारतीचं उदघाटन केलं.
दोघांमध्ये नेमकं काय संभाषण झालं?
मेधा कुलकर्णी – दादा साडेसहाच्या आधीच झालं, साडेसहाची वेळ होती पण त्याआधीच झालं
अजित पवार – मला काय माहिती तुम्ही येणार
मेधा कुलकर्णी – मी येणार नाही, परशुराम आर्थिक विकास महामंडळ आहे. कधी नव्हे ते झालंय
पुढे त्या म्हणाल्या, “आम्ही सगळ्याच कार्यक्रमात जात असतो. समाजाच्या वेगवेगळ्या लोकांसाठी काम करत असतो. येथेही आमचे काही बांधव येणार होते, ते रस्त्यात होते. साडेसहाची वेळ होती, त्याआधी उद्घाटन झाल्याने तेही पोहोचू शकले नाहीत. आणि मी पोहोचूनसुद्धा त्यात सहभागी होता आलं नाही”.
